Беларусь – наша зямля

Пасьля абвестак з прапановай пачаць ствараць зародак БДР, якія былі пададзены раней на нашым сайце, мы абавязаны даць справаздачу.

На першую сустрэчу прыйшлі людзі, якіх вы бачыце на фота (гэта вядомы беларускі дзеяч Анатоль Белы, прадпрымальнікі Сяргей Шынкевіч і Алег Віцень, студэнты Зьміцер, Зьміцер, Ягор, Зьміцер і рэдактар сайта “нашазямля.орг” Алесь Астроўскі), а таксама а. Леанід Акаловіч (які трохі спазьніўся і таму на агульнае фота ня трапіў). З улікам сябраў рэдакцыі, а таксама палітычных уцекачоў у Нямеччыне – Галіны Арцёменкі й Яўгена Мурашкі, якія заранёў даслалі свае Е-лісты з просьбай уключыць іх у справу – вось тыя 12 чалавек, якія і ёсьць зародкам, зь якога ўсё пачынаецца… Дата падзеі: 28 сакавіка 2009 г.

На жаль, у час сустрэчы надвор’е было вельмі кепскім (было холадна й ішоў дождж са сьнегам), таму пасьпелі зрабіць толькі самае галоўнае – людзі пазнаёміліся, сьцісла абмеркавалі сітуацыю ў Беларусі й навокал і пагадзіліся, што трэба ствараць таварыства, якое б занялося выкананьнем першага этапу (Веды) абвешчанай раней праграмы. Пагадзіліся, што нашым “богам”, якому павінна быць падпарадкавана ўсё іншае, павінны быць аб’ектыўныя інтарэсы беларускага народа, і што наша дзейнасьць будзе цалкам легальнай. З большага высьветлілі схільнасьці ды магчымасьці кожнага (у асноўным яны былі зьвязаны з цікавасьцю да гісторыі й беларускай культуры) і дамовіліся дасылаць адпаведныя матэрыялы на сайт “нашазямля.орг”. Астроўскі паабяцаў актывізаваць працэс складаньня пашыранага праекта Праграмнага вобраза будучай беларускай дзяржавы.

Вось, у прынцыпе, і ўсё.

Гэты запіс апублікаваны: Нядзеля, 29 сакавіка, 2009 у 05:02
Катэгорыі: 1.3. Беларусь сёньня, 2.1.1. У разьвіцьцё Бел.Нац.Ідэі, 4.1.4. Змаганьне за дэмакратыю. Вы можаце сачыць за каментарамі пры дапамозе RSS 2.0 стужкі.
Вы можаце пакінуць каментар. Але пінгі забаронены.